శ్రీకృష్ణాష్టమి శుభాకాంక్షలతో
కం:అష్టమ సుతుడై భువిలో
శిష్టుల కావగ జనించె శ్రీకృష్ణుండై
దుష్టుల దునిమెద తండ్రీ
కష్టములిక తొలగునంచు కమ్మగ పలికెన్.
కం :పదునాలుగు భువనములను
వదనముననె జూపినట్టి వంశీ కృష్ణా
మధురంబగు నీ సుందర
వదనమ్ము గనెడి యదృష్ట భాగ్యము నిమ్మా!
ఆ.వె:కొంటె కృష్ణుపైన కొండెముల్ జెప్పుచు
పట్టి తెచ్చిరతని పడతులెల్ల
తల్లడిల్లి తల్లి తనయు రోటను గట్ట
నింతు లెల్ల గనిరి వింత తోడ.
ఆ.వె:వజ్రి యలుక చెంది వర్షమ్ము కురిపించ
భయము చెంది గోప బాలురెల్ల
నటునిటు తిరుగంగ నవ్వుచూ కృష్ణుండు
కొండ నెత్తి కాచె కూర్మి తోడ.
ఆ.వె: వజ్రి కోపగింప వర్షముధృతమయ్యె
గోపకాంత లదర,గోవులెల్ల
బెదరు చుండ పలికె భీతి వలదటంచు
శౌరి,యపుడె తాను శైల మెత్తె
ఉపేంద్రవ్రజము:
మురారి రారా మనమోహనా రా
విరాట రూపా వెత దీర్చగానూ
కరాభయంబిచ్చుచు కంజ నాభా
పరాకు నేలయ్య యోపంక జాక్షా.
ఆ.వె:యుద్ధ రంగమందు నుపదేశ మొనరించె
నర్జునునకు గీత నాది లోనె
నేటి కదియె గాద నెమ్మది నొసగేను
సత్యమైన దిదియు జగతి యందు.
ఆ.వె:కృష్ణ నామ మొకటి తృష్ణను దీర్చేను
కృష్ణ కీర్తనంబు కీర్తి నొసగు
కృష్ణ కృష్ణ యన్న ఖిలమౌను పాపాలు
కృష్ణుని గొలువంగ కీడు తొలగు.
ఆ.వె:వెన్నదొంగ వనుచు వేనోళ్ళ జనములు
పొగడు చుందురయ్య పుడమి యందు
వేదగోచరుడవు విశ్వంభరుండవు
కావుమయ్య వేగ కమలనేత్ర.
ఆ.వె:వెన్న దొంగ వంచు వెక్కిరించగ బోను
చీరలెత్తితివని చీర బోను
వరము లొసగు నట్టి వాసుదేవా నిన్ను
వెతలు దీర్చు మంచు వేడు కొందు.
No comments:
Post a Comment