కవితాసుమాలు

సీతాకోకచిలుక

   రంగు రంగుల సీతాకోకచిలుకా

 అందించవే మాకు నీ ఒంటి మిలమిల

   గడియకో రంగు మారేవు నీవు

 సరికొత్త రంగుల్లో కనువిందు చేస్తావు

  నీ హొయలు నీ కులుకు చూస్తుంటె మాకు

 నిను తాకి ముద్దాడ మనసౌను చూడు

    ప్రతి పూవుపై వాలి అందంగ నీవు

    మకరందమే గ్రోలి మురిసి పోతున్నావు

   ఆ  తేనె లో తీపి నీ కంటె నేమో

   మరి మరీ తీయగా ముద్దొస్తు వున్నావు

   ఎవ్వరికి దొరకక వూరిస్తు వున్నావు

   ఒక్క చోటనైన కుదురుగా వుండనే లేవు

    రంగు లాగే బుద్ధి మార్చుకొంటున్నావు

   ఈ రంగు ఈ పొంగు స్థిరము గాబోదు

   వెలిసి పోయాకెవరు పట్టించుకోరు

   బాహ్యసౌందర్యము బుద్బుదప్రాయము

   అంతస్సౌందర్యము   అజరామరము.

బల్లూరి ఉమాదేవి

22/4/15

పేరు:డా.బల్లూరి ఉమాదేవి.

అంశం :గాంధీ జయంతి

*భరతమాతకు ముద్దుబిడ్డడు

భారతజాతికి మార్గదర్శకుడు

జాతికి నేత బాపూజీ

జాతికే పిత మన గాంధీజీ

సత్యాహింసలె ఆయుధాలుగా

సాధించాడీ స్వాతంత్ర్యం

కల్లా కపటాలెరుగనివాడు

కల్లలాడడం తెలియనివాడు

అతివాదులను మితవాదులను

సమైక్యపరచిన సహనశీలి

విద్యార్జనకై విదేశమేగిన

స్వదేశ హితమునె కోరాడు

ఆఫ్రికన్లకు అండగనుండి

దౌర్జన్యాలను నిరసించాడు

వర్తకానికని వచ్చినవారే

పెత్తనాలను చేస్తూవుంటే

మునిలా మౌనం పట్టనెలేదు

ఆవేశాన్ని చూపనె లేదు

సహనంతోనూ శాంతితోనూ

స్వరాజ్యాన్ని సాధించాడు

నూలువడకటం నేర్పాడు

ఖాదీ వస్త్రం నేశాడు

స్వదేశి వుద్యమం తలపెట్టాడు

విదేశి వస్త్రం వలదన్నాడు

మన సామాగ్రికె సుంకమెందుకని

నిలదీశాడు నినదించాడు

సమర శంఖం పూరించాడు

నేతగ ముందుకు కదిలాడు

జాతికి సాంత్వన కూర్చాడు

అందరి మనములు గెలిచాడు

అయ్యాడందుకె మహాత్ముడు

అందిద్దాం జోహార్లు

వేలవేల జోహార్లు.

డా.బల్లూరి ఉమాదేవి.

2/10/17.