ప్రకృతి.

మిత్రులందరికీ శుభోదయం

శీర్షిక:ప్రకృతి.

ఆ.వె:పాడిపంటలున్న పల్లెటూళ్ళెల్లను
          పలకరించు జనుల పరవశాన
         ఇరుగు పొరుగు తోడ నింపైన ముచ్చట్లు
        ముదము కూర్చు చుండు మదికి నెపుడు.

ఆ.వె:అన్ని ఋతువు లందు నానందమొసగంగ
         చెలమ లోని నీరు సేద తీర్చ
         పిల్ల గాలి మదికి ప్రీతిని కూర్చగా
          ప్రకృతి కోరు జనుల బాగు సతము.

ఆ.వె:గగన మందు శశియు కనువిందు చేయంగ
        తారలెల్ల మురిసి తళుకు లీన
        సంతసాన ప్రకృతి సంబరమ్మును కూర్చ
         హితము కలుగు గాదె నిలను జూడ.

ఆ.వె:పచ్చనైన చెట్లు ఫలముల నివ్వంగ
        చల్లగాలి మదికి చలువ గూర్చ
        ప్రకృతి యెల్ల హాయి పంచుచు నుండంగ
         అంతు లేని హర్ష మావరించు.

ఆ.వె:తరణి కిరణముగని తామరలు విరియు
        గగనమున శశిఁ గని కలువ విరియు
         తరువు లొసగు చుండు ధరలోన ఫలములు
         పరవశింప చేయు ప్రకృతి యెపుడు.